Luk 6 | BEF | STEP | To Yesu fuli kana moneluguti nose foya ya'ma laisi legeya tegina ni'inagi folagaha'agu kapo moloto bu'ehina. Ya nohigo koko pana'a mege'i lifite nebanati legeya nesi'asi li laga hite enayanuga lilete li goso gusu ite noha'a li nehe'mite nose'na'a ne'ahana yabe.

Luke 6

Fuli yupapogu lili'na melisemofihi kaga'a

Mt 12:1-8; Mk 2:23-28

1 To Yesu fuli kana moneluguti nose foya ya'ma laisi legeya tegina ni'inagi folagaha'agu kapo moloto bu'ehina. Ya nohigo koko pana'a mege'i lifite nebanati legeya nesi'asi li laga hite enayanuga lilete li goso gusu ite noha'a li nehe'mite nose'na'a ne'ahana yabe. 2 To Felosi bona'i luga'amagi bu gelete ma li'ahana: Fuli yupapogu o'e li'ahana supo lenali hena'mu ya nehabe? 3 To Yesu ka'anilo nona'a ma luto lu'ehina: To lenali koyapa sipi bo Tebitiu hu'ehinanamofihi fayaha'a leka sete mekeheli'ahafihe? Tebitiu lalu'agi hiti sipi enakau'na lo'ehinamo'mu nolube. 4 Ya nohigo ai Hu'mamofihi noha'agu tiloto Hu'mamofihi bulo ni'ina beleti lito'a nonoto lalu'agi mege'i ana noepito ne'ahana. To ya'mana beleti mono bona'magigo nelata nehabe. To fato fato bona'i mo silabe. To ya hu'ehinamofihi ka'a leka sete mekeheli'ahafiye? 5 To Yesu ai ma luto lu epi'ehina: To nani Kokulumaguti limi'ohuna Boya ya'ma fuli yupapofihi sipi kaba bo nohube.

Fuli kanagu bo mone yahi sibina hu'ehina Yesu le'mo bati hu eto'ehina

Mt 12:9-14; Mk 3:1-6

6 Mone fuli kanagu Yesu mono nonugu buto tito mono ka boana'i lu epi'ehina. Ya nohigo bo mone yahi lamaga'aga sibina hu'ehina bo mino'ehina. 7 To Felosi bona'i hiti keya ka kehelise bona'i hiti Yesuhi mapahi fite mine'ahana. To enali fuli kanagu enebesise bona'i enele'mo bati hilifi to enele'mo bati mehilifi lite mapahi fite mine'ahana. To enali fisa ilune'mu ka foyagu Yesuhi le'mo malalana kapo'mu kaba hite mine'ahana. 8 To Yesu al'a komopa'anigu abu goloto yahi sibina hu'ehina bomofihi ma luto lu emi'ehina: Kai ho tito malo tobo. Ya noligo ana bo ho tito analo mino'ehina. 9 To Yesu ma luto lu epi'ehina: Nani lenoloka nohobe. To keya kauba fuli kanagu hena hilo luto lu'ehinabe? To bona'i enehe'malo lu'ehifi to enahalo lu'ehibe? Le'mo bati hilo lu'ehifi to le'mo sibina hilo lu'ehibe? 10 To Yesu asaga bona'i mono nonugu minananamagihi bu bego huto bu enogoloto ai ma luto yahi sibina hu'ehina bomofihi ma luto lu emi'ehina: Kayahaka li su tobo. Ya ligo ana bouba yaha'a li su notago aku'i ana'asilo bati ahu'ehina yabe. 11 To enali enitaluga logo bilago ai lu emigo ai lu emigo ma lite li'ahana: Lali Yesuhi hena hu etalune?

Yesu pana'alobomagihi 12 enele'mo'ehina yabe

Mt 10:1-4; Mk 3:13-19

12 To ya'mana yupahi Yesu nunumu hilube'mu kosa monelugu tiloto Hu'mamofitoga nunumu hu emi'ehina. To nunumu huba huba nohigo sinihi gito go'i lu'ehina yabe. 13 To yege tilago koko pana'a kehe igo e'ahana. To ai nayahi luga luga su hago to nigigusagati loemo heleko malago pana'alobo'a liloto aposolo bona'i yabe luto enigi'ani molo'ehina yabe. 14 To mone folagaha'anigu Simoniu yabe luto mino'ehina gi'a Yesu Pita yabe luto molo'ehina. To Atulu ai Simonihi gona'aya. To Yemesiugo Yoniugo to Filipiugo Batolomugo yabe. 15 To Matiu'ugo to Tomasiugo. To Yemesi ai Alifiasihi pana'a. To Simoni ai fato gi'a, amuya ka bo yabe, luto gi'a mino'ehina. 16 To Yutasi ai Yemesihi pana'a. To Yutasi Isikelioti ai aliha'a minoto Yesuhi fateha'amagihi epi'ehina yabe.

Yesu babu boanatoga lili'na yabe

Mt 4:23-25

17 To Yesu enali hiti limito me'i kuguma hinalo koko pana'a luga'a hiti ho ti'ahana. To babu boana'i Yutia kegi'ati to Yelusale hepatoti yagi to Taiya nagami beletoga bona'i yagi to Saitoni hepato bona'i ete mine'ahana yabe. 18 To enali enebesise'na'ani li he'milibe lite to ai ka'a hiti kehelilune lite e'ahana yabe. To foipa feleuba enugufalo ti'ehina bona'i ete minago Yesu li he'mi epolo'ehina yabe. 19 To asaga boana'i Yesuhi gufa'alo enayatu'i meko lilune'mu hi'ahana yabe. To hena'mube? To Yesuhi amuya'auba buto asaga bona'i enele'mo bati higo ye ke'ahana.

Yesu bona'i enofokehi hete neminete to yibi nehite hilanamofihi ka'a lu'ehina

Mt 5:1-12

20 To Yesu koko panana'a bu enogoloto lu epi'ehina: Lenofokehi hose'na lenali fe'nohatini meni'ilina bomagitaloga mineno, to Hu'mamofihi kapo'a hetofana'a lenali'na yabe. 21 To bona'i lenali yatai kau'na nolenahana lenofokehi hete mineno. Alihi nose'na nelete lenumu hilina'mu yabe. To lenali yibi yatai hite nehana bona'i lenofokehi halo. To alihi lenali kiya hilana'mu yabe.

22 To bona'magi enipakafa lenehenogomo lenofokehi halo. To lenali Kokulumaguti limi'ehina Bo mege'i nemelenogomo bona'magi lenipakafa halanamo'mu nolube. To enali lenele'mo he'milana yabe. To ka foipa'a li lepalalabe. To lenigitini li sibina sabana hite halana'mu yabe. To asaga ya'mana nehi lepelenogo lenali sipi lenofokehi halo. 23 Ya'mana huto nohinogomo kofokehi nohoto hele kolago tila limila nohuto melekehi ibo. To ya hilananamofihi mina'a kokulumalugu sipi'a mino lepalalina'mu yabe. To koyapa'i tata'anigi ya'mana suhi mono lu yege hose bonatoga foipana hi epele'ahana yabe. 24 Ehe. Lenali fe'nohatini babu lina bona'ise. Lenali bati huto minose'natini ali su he'ahabe. 25 Ehe. Bona'i lenali nose'na yatai lenumu higo nete neminana aliha'a kau'na lenoho laligi. Ehe. Bona'i lenali yatai kiya hite neminana kaba hilo. To lenali alihi sipi yibi hite lenubu nogoya limo ilina'mu yabe. 26 To asaga bona'i lenigitini li saga hilanamoya, ehe, kaba hite minalo. Koyapa'i tatatinigi ana suhi hite fagalo mono bomagitoga li'ahana yabe.

Fatehatimagihi enele'mo bati husemofihi ka'a

Mt 5:38-48

27 To ka'ni nekehelina bona'i kehelilo. Fatehatini enele'mo bati hilo. Lenipakafa nehalana bona'i enele'mo bati hite hetofanaguti kaga lu epilo. 28 To lenele'mo sibina hilune'mu huli ka lu lepilana bona'i bebe sana ka lu neepite ana hite ka lu sibina hi ketalana bona'i enehe'moto numuna hu epolobo. 29 To bo moneuba kabaga hapa'alo noinogomo mone kegi'a hu emitogo ino. To bo moneuba kefeka nolinogomo guketeka mone hiti li goli mehuto li anaga meletogo lino. 30 To bo moneuba kai ana'inakalo nimibo luto kehe ilina emibo. To bo moneuba ana'inaka gumina li'ehinogomo amuya moloto ka emekito nasana'ani ito obo luto melubo. 31 To bona'magi suhi mone hu epalalube luto nokehelilata suhi kalalukagi enalitoga hubo.

32 To bo moneuba kaitoga ipa'a nokiminogo to kai ana bomofihi kipa'a ana huto emilata aliha'a hetofa bo nohube luto kofokehi lilifiye? To bo foipa'amagi hiti enipa epina bona'magi ana hite enipa epilata nehabe. 33 To lenali bona'i lenele'mo bati hana bonalogo enele'mo bati hilata nehana henana mana'a huto hulata nohibe? To bo foipa'amagi hiti ana suhi ya hilata nehabe. 34 To kai ana'ina bona'i mone'magitoga aku'i nona'a nimilanalo yabe luto noepitanalo nona'a hena huse hetofana lilata nohane? To foipa bomagi hiti foipa bologa ana'ina'ani neepite ana babeyafa hinana nona'a lilutamo yabe lite lilata nehabe. 35 O'e. Lenali fatehatini enele'mo bati hilo. Ya nehite ana'ina lepilanalo aku'i nona'a limilabe lite melilo. To lenali ya hite minalana aliha'a lenali mina'a sipi lilete Sipi Bo Hu'mamofihi panana'a minalana'mu yabe. To ai ipa'a fokehi menehana bona'i hiti to foipa bona'i hiti noepito hetofana hu noepolobe. 36 To lenali ana hite Hu'mau lenele'mo bati nohina'a hite lenalalutinigihi enele'mo bati hilo.

Bona enele'mo yegelo molose'namofihi hapa'a

Mt 7:1-5

37 Lenali bona'i enele'mo yegelo memelenogo Hu'mau ana huto lenele'mo yegelo memalalibe. To lenali bona'i enifisa fato fato meinogo ya hinogo Hu'mau lenali'i lenifisa fato meilibe. To lenali bona'i foipana'a hu lepololenogo li he'milanaya Hu'mau ana huto foipanatini li he'mito pa so lepalalina'mu yabe. 38 To lenali lenalalutinigihifi bonoho bofi nasana epilo ya hinogo Hu'mau ana huto nasana lepilibe. To ya hinogo bona'magi le'mo bati hite guna i lepite lepi babu linogo bai toto i bili mo ise'na hinogo lepilabe. To bona'i nasana neepina legege'asilo Hu'mau aku'i ana legege'alo nasanatini lepilibe.

39 Yesu ma bame ka lu epi'ehina: To bu sibina hina bo moneuba ana huto bu sibina hu'ehina bo mone yato lito buyu huto mebilina'mu yabe. Ya hilinagi etali loe sana sana keligu limila'ina'mu yabe. 40 To sukulu pana'i moneuba tisa'amofihi hoto meminolata nohibe. To ai sukulugu buloto lepise kana'a su holenogo huloto'a yalo'i tisa'a hiti moneko legege neha'ibe.

41 To kai hena hibe luto kefa fulupa kubugu nina bu megose kogonakamofihi bugu pehena nina bu nogane? 42 To kai hena huto kogonokamofihi ma luto lu emilatabe? Ke, nogona'nimakabe, kubugu pehena nina bati huto li he'mi ketalufihe? To kaika kubugu kefa fulupa ko'ehilina bu megose ya lilata'mu yabe. To kai fagalo bo yata'a kai kubukagu ni'ilina kefa fulupa li he'miloto alihi kogonakamofihi buguti pehena ni'ilina bu go fana to'ohuto li he'mi etobo, luto Yesu bame ka lu epi'ehina yabe.

Yafa mone numutopa lo'ehilinauba legeya'a ho bati mehalina'mu yabe

Mt 7:16-20; Mk 12:33-35

43 To hetofa yafauba legeya'a sibina huto holata menohibe. To ana suhi huto yafa numutopa'a lo'ehina'auba legeya'a le'mo bati huto holata menohibe. 44 To bona'magi yata'a yafa legeya'a loko be gelete'ani ya uma yafa bati yafa yagi lila to yafa numutopa'a ni'inagi lite be go kehelilata nehabe. To enali bona'magi nemuya legeya'a ufehena nina nagatoti ligilata menehabe. To bai nagami'i lolo nehana legeya'a sibina hu'ehina yafa mone ufehi ni'ilinaloti ligilata menehabe. 45 To hetofa bo mone'mofihi ka kehelise'na'a babu lito ipagu hetofana minolata nohibe. Ya hu'ehigo hetofa sunogo li huto hulata nohibe. To bo sibina'amofihi ka bati mehina'a babu lito ipaguti huto hulata nohibe. Ya nohigo bati mehina suhi li huto hulata nohibe. To yaka'mana kaga enipagu bai toto nominana enabagaguti tito bulata nohibe.

Nohi gise'namofihi hapa'a loemo

Mt 7:24-27

46 Lenali henabe luto kibina botimakase kibina botimakase lite nani kumu nelana aku'i ka'ni he'mite kegeiyo hite neminabe? 47 Nani ka'ni kehelito nominata bomo henana legita nohibe? Ai ka'ni kehelito to akili mehuse nanitoga keheli nimito nominata bomo, henana legita nohibe? Nani lu lepilube. 48 Bo moneuba noha'a gilube'mu nohuto'a, lukesa keli iba iba huto ya ema kifito buto buto, to efahi huto nohinogomo lukesa filina'mu yabe. Noha'a ya huto ginogomo, alihi ko'mo ito to nagami'i holoto tito nopo gi'ehinalo bilito tiloto nohi tele mebilina'mu yabe. Bati huto gi'ehina nopo ni'igi, nagami'uba ana nopo tele mebilina'mu yabe. To nani ka'ni kehelito agoya hu nimilata bouba, ai ya'ma legita nohibe. 49 To aku'i bo moneuba ka'ni kehelito to ana ka'ni he'mito akili huto nominata bouba, ai ya'ma legita nohibe. Bo moneuba noha 'a gilube'mu nohuto'a, lukesa keli nesi'asi ito fa'mene efapolo lukesa mefise noha'a gilibe. Ya huto ginogomo, alihi ko'mo ito to nagami'i holoto tito nopo gi'ehinalo bilito tito ana nopo ana'asi, mele'isi tele bilina'mu yabe. Nohi asaga'i gofana huto tele bi su halina'mu yabe. Ai akili huto nominata bouba ai ya'ma legita nohibe. Ai ka'ni kehelito to ana ka'ni he'mito akili huto nominata boube, ya'ma legita nohibe. Yesu ya luto lu'ehina yabe.